KANJENG NABI ADAM DILEBETAN RUH
Diriwayatkeun deui, satemenna Gusti Alloh marentah ka Ruh kedah lebet kana jasadna Kanjeng Nabi Adam.
Saparantos diparentah, teras eta Ruh lebet kana salirana Kanjeng Nabi Adam tina embun-embunaannana. Teras eta Ruh muter dina polona kira-kira jaman 200 taun. Teras eta Ruh turun kana dua socana, breh anjena kana salirana masih keneh taneuh garing. Teras eta Ruh turun kana dua cepil duanana. Di dinya anjeuna ngadangu kana tasbehna malaikat. Teras eta Ruh turun kana liang pangambungna, terus anjeuna bersin. Teras eta Ruh turun kana cangkemna sareng kana ilatna, teras ku Gusti Alloh diwuruk "alhamdulillah", dijawab ku Gusti Alloh "ya harmukalloh robbuka ya Adam. Muka mika asih Pangeran ka maneh, heh Adam". Teras eta Ruh turun kana pinareupna, anjeuna palay ngadeg, mung henteu tiasa, jalaran sapotong deui kahandap teu acan kapanjingan Ruh, taneuh keneh. Kumargi eta, didawuhkeun ku Gusti Alloh "wakana insanu a'julan", hartosna wallohu a'lam: "Kaayaan jalma teh sok gurung gusuh". Tidinya teras eta Ruh turun kana patuangannana kanjeng Nabi Adam. Barang turun kana patuangan, Kanjeng Nabi Adam palay barang tuang, tidinya teras Ruh nyaliara kana sakuliah salirana, mangka jadi daging jadi getih sareng jadi rupi-rupi urat anu ageung anu alit. Tidinya teras Nabi Adam dipaparin anggoan tina kuku anu kacida lucuna. Dina saban-saban dinten tambih kakasepannana. Barang Kanjeng Nabi Adam tuang kayu
larangan tea, teras eta anggoan kuku morosot tina salirana, anu kantun mung dina tungtung ramo supaya jadi paemutan ka anjeuna.
-
